እውነት አለቀሰች

                                                   ልብ ያለህ አስተውል፣ ጆሮ ያለህ ስማ፣

                                  እግርህ እንዳይገባ ከክህደት ከተማ::

                                  የያዝከውን አጽና ልብህ አይጨነቅ፣

                                  ለጥያቄህ መልስም ሊቃውንትን ጠይቅ::

                                  ለእውነት የቆመ ሃይማኖቱን የሚያውቅ፣

                                  ንባብ ትርጓሜን ጠንቅቆ የሚዘልቅ፣

                                  ተናገር ዮሐንስ አንተ ልሳነ ወርቅ::

                                  ቄርሎስን  ጠይቀው የተቀብዐን ምስጢር፣

                                  የክርስቶስ ነገር  እንዴት እንደነበር፣

                                  ከብሉይ ከሐዲስ በማቀነባበር፣

                                  እንዳመሰጠረው በብዙ ምስክር::

                                  ነቢዩ ኢሳይያስ  ብርሃነ ዓለም ጳውሎስ፣

                                  መዝሙረኛው ዳዊት ሐዋርያው ሉቃስ፣

                                  አባ ዝክረ ማርያም ወአባ ጴጥሮስ፣

                                 የስነ ፍጥረት ሊቅ ኤጲፋኒዮስ፣

                                 ዝም አትበል ተናገር ቅዱስ ሳዊሮስ፣

                                  በሥጋው መክበሩን አምላክ ክርስቶስ::

                                  ጊዮርጊስ ተናገር አንተ የጥዋት ጮራ፣

                                  ክርስቶስ መሲሕም ተብሎ እንደሚጠራ::

                                  ወልድ ቅብዕ በማለት ክህደት አስተማሩ፣

                                  የሥግው ቃል ነገር መች ገባቸው ዳሩ፣

                                  የተዋሕዶ ምስጢር ሳይገባቸው ቅሉ፣

                                  ሃይማኖት ከምስጢር ይደባልቃሉ::

                                  ክርስቶስ በሥጋ  እንደሞተ ሲያውቁ፣

                                  በሥጋስ መክበሩን እንዴት አላወቁ፣

                                  ሊቃውንት እያሉ ለምን አይጠይቁ፣

                                  “በተዋህዶ ከበረ” ብለው ሲናገሩ፣

                                  ለዚህ ብሂላቸው የታል ምስክሩ::

                                  ግብርን በማፋለስ አንድ ገጽ ካለው ከሰባልዮስ፣

                                   አንድነትን ትቶ ሁለት አካል ካለው ከርጉም ንስጥሮስ፣

                                   መንፈስ ቅዱስ ሕጹፅ ካለው ከመቅዶንዮስ፣

                                   ወልድ ፍጡር ካለው ከርጉም ከአርዮስ፣

                                    የዚህም ክህደቱ በምንም አያንስ::

                                    ፈላጊዋ ጠፍቶ “እውነት አለቀሰች”፣

                                    ግብራቸው ተቃርኖ ሀሰት ጥላት ሄደች::

                                    ዳሩ ግን ወገኔ ይህ ክህደት ነውና፣

                                    ቀኑ ሳይመሽብህ መንገድህን አቅና፣

                                   እውነትን ከፈለግክ ታገኛለህና፣

                                   እረፍት ስላላት  የህይወት ጎዳና፣

                                   የያዝከውን ይዘህ በሃይማኖት ጽና::